SKÁKSÖGUFÉLAGIÐ – VEFSÍÐA OG KENNIMARK

bordi

Hið íslenska skáksögufélag var stofnað fyrir rúmu ári síðan með það að markmiði að stuðla að því að sögu manntaflsins og skáklistarinnar á Íslandi, að fornu og nýju, verði sem best til haga haldið. Jafnframt skyldi félagið beita sér fyrir því að saga fræknustu skákmeistara okkar og helstu skákviðburða hérlendis yrði skráð, auk þess að vinna að varðveislu hvers konar skákminja og muna, eftir föngum. Ærin verkefni sem óvíst er hvort félagið eða stjórnarmenn þess fái nokkurn tíma undir risið nema með öflugum stuðningi skákunnenda og hins opinbera.

SSF-001Stjórn félagsins er því mikið ánægjuefni að geta nú greint frá því að fyrsta stóra viðfangsefni þess, að byggja upp mjög viðamikla og efnisríka vefsíðu tileinkaða fyrsta stórmeistara okkar FRIÐRIKI ÓLAFSSYNI , skákferli hans og glæstum afrekum er lokið.

Hér er um að ræða afar fjölbreytta upplýsingasíðu með ótal gömlum blaðafréttum, greinum og viðtölum við meistarann, auk yfirlits um öll mót hans, með flestum skákum hans og úrslitum gegn einstökum mótherjum. Síðan er ríkulega myndskreytt með ljósmyndum frá ferli Friðriks auk fjölda annarra úr íslensku skáklífi frá miðbiki síðustu aldar fram til þessa dags. Þeir Hrafn Jökulsson og Tómas Veigar Sigurðarson eiga mestan heiður af gerð hennar og eiga miklar þakkir skyldar.

Einar Ess og Kirsten Sevik DesjardinsHeimasíðan verður formlega opnuð af Illuga Gunnarssyni, menningarmálaráðherra, á þriðjudaginn kemur, íslenska skákdeginum, afmælisdegi Friðriks, í upphafi vikulegs skákmóts eldri borgara í félagsheimili FEB, Ásgarði við Stangarhyl, þar sem Friðrik Ólafsson verður heiðursgestur.

Í aðdraganda þessa þótti fara vel á því að láta hanna sérstakt einkennismerki (logo) fyrir félagið og fengin til þess norsk-bandarísk myndlistarkona Kirsten Sevik Desjardins, sem hér dvaldi um tíma, og tók það að sér „pro bono“ endurgjaldslaust fyrir góðra manna orð til að skilja eftir sig listrænt spor hér á landi. Einkar táknrænt kennimark sem samanstendur af riddara, fjöðurstaf og bók eins og getur að líta. Það fór því vel á því að færa henni þakkarskjöld að launum með merkinu að skilnaði.

/ESE

www.kirstensevig.com

Facebook athugasemdir