MS Afmælismót Jónasar Hallgrímssonar í Ráðhúsi Reykjavíkur í dag

Jónas HallgrímssonMörg efnilegustu börn og ungmenni landsins eru skráð til leiks á MS Afmælismóti Jónasar Hallgrímssonar í Ráðhúsi Reykjavíkur í dag kl. 14. Jónas fæddist 16. nóvember 1807 og því eru í dag 207 ár frá fæðingu þjóðskáldsins. Taflfélag Reykjavíkur og Hrókurinn standa saman að mótinu, enda hafa skák og skáldskapur átt samleið á Íslandi frá öndverðu. Heiðursgestir við setningu mótsins eru frú Vigdís Finnbogadóttir fv. forseti Íslands og Friðrik Ólafsson stórmeistari, fv. forseti FIDE. Illugi Gunnarsson menntamálaráðherra flytur setningarávarp og Guðný Steinsdóttir markaðsstjóri MS leikur fyrsta leikinn.

Verðlaunagripir á MS Afmælismóti Jónasar Hallgrímssonar

Verðlaunagripir á MS Afmælismóti Jónasar Hallgrímssonar

MS Afmælismót Jónasar Hallgrímssonar er ætlað börnum á grunnskólaaldri og er gert ráð fyrir 64 keppendum og er þegar fullbókað á mótið. Tefldar verða 7 umferðir með 7 mínútna umhugsunatíma. Fyrstu verðlaun eru 30.000 krónur, önnur verðlaun 20.000 og þriðju verðlaun 15.000. Verðlaun fyrir bestan árangur stúlkna er 10.000 kr. Þá verða 4 heppnir keppendur dregnir út sem hljóta 5000 krónur hver. Þeim til mælum er beint til þátttakenda að mæta snyrtilega til fara, enda verður best klæddi keppandinn verðlaunaður sérstaklega með 5000 kr.

Veitt eru verðlaun og viðurkenningar fyrir bestan árangur í þremur aldursflokkum: 1.-3. bekk, 4.-6. bekk og 7.-10. bekk. Mjólkursamsalan mun sjá keppendum fyrir veitingum á mótsstað.

laerdu_ad_tefla_bjornjonssonÞað er Taflfélagi Reykjavíkur og Hróknum mikil ánægja að heiðra minningu Jónasar Hallgrímssonar (1807-1845) sem vafalaust má telja ástsælasta skáld Íslandssögunnar. Skák og skáldskapur, þessar miklu íþróttir hugans, eiga vel saman og á dögunum stóðu TR og Hrókurinn fyrir glæsilegu Afmælismóti Einars Benediktssonar og er í ráði að minnast fleiri skálda með þessum skemmtilega hætti. Mjólkursamsalan hefur gegnum tíðina verið ötull bakhjarl skáklífs á Íslandi, og hefur líka markvisst beitt sér fyrir eflingu móðurmálsins í rúmlega 20 ár.  Kjörorð MS í þeirri vinnu er Íslenska er okkar mál. Um árabil hafa verið birtir textar af ýmsu tagi á mjólkurumbúðum, ábendingar um gott málfar, útskýringar á orðtökum og fallega skrifaðir textar.

Við setningu mótsins mun Björn Jónsson formaður TR kynna nýja skákbók, Lærðu að tefla, sem út kom í vikunni. Þetta er fyrsta frumsamda, íslenska kennslubókin í skák sem út hefur komið hérlendis í áraraðir og er afar kærkomin, því mjög mikill áhugi er meðal barna og ungmenna á skák.

Áhorfendur eru hjartanlega velkomnir.

Facebook athugasemdir