Jón L. Árnason og Lenka Ptacnikova, sigurvegarar á Minningarmóti Birnu Norðdahl.

Glæsilegt Minningarmót Birnu Norðdahl á Reykhólum: Lenka og Jón L. efst

Birna Norðdahl yngri leikur fyrsta leikinn fyrir Hrund Hauksdóttur gegn Hannesi H. Stefánssyni.

Birna Norðdahl yngri leikur fyrsta leikinn fyrir Hrund Hauksdóttur gegn Hannesi H. Stefánssyni.

Íslandsmeistarinn Lenka Ptáčníková og stórmeistarinn Jón L. Árnason sigruðu á Minningarmóti Birnu Norðdahl á Reykhólum laugardaginn 20. ágúst. Keppendur komu hvaðanæva af landinu og var mikil stemmning í íþróttahúsinu þar sem mótið fór fram við frábærar aðstæður.

Mótið var haldið til að minnast Birnu E. Norðdahl (1919-2004) sem var brautryðjandi í kvennaskák á Íslandi. Birna var bóndi og listakona og fyrsta konan sem sögur fara af að hafi teflt á skákmóti hérlendis, árið 1940. Hún átti frumkvæði og allan heiður af því að íslensk kvennasveit fór í fyrsta skipti á Ólympíuskákmót, í Argentínu 1978.

Birna Norðdahl og fyrsta kvennasveitin í skák - ESEÍslenskar landsliðskonur í skák voru heiðursgestir á mótinu á Reykhólum, og í þeim hópi voru skákkonur sem tefldu með Birnu á Ólympíumótum 1978 og 1980. Þetta var hluti af upphitun kvennalandsliðsins fyrir Ólympíumótið í Bakú sem hefst eftir hálfa aðra viku.

Tefldar voru 8 umferðir með 10 mínútna umhugsunartíma og voru keppendur 37, þar af fjórir stórmeistarar. Í kvennaflokki urðu Lenka Ptáčníková og Hallgerður Helga Þorsteinsdóttir jafnar og efstar, en Lenka var hærri á stigum. Guðlaug Þorsteinsdóttir, sem varð fyrst kvenna Íslandsmeistari, árið 1975, hreppti bronsið, en jafnar í 4.-7. sæti urðu Hrund Hauksdóttir, Veronika Steinunn Magnúsdóttir, Áslaug Kristinsdóttir og Sigurlaug R. Friðþjófsdóttir. Þær Áslaug, Guðlaug og Sigurlaug voru allar í landsliðinu samtíða Birnu, rétt eins og Svana Samúelsdóttir, sem tók núna þátt í skákmóti eftir langt hlé.

Hlynur Þór Magnússon sagnfræðingur á Reykhólum, sem átti frumkvæði að Minningarmóti Birnu flytur ávarp við setningu mótsins.

Hlynur Þór Magnússon sagnfræðingur á Reykhólum, sem átti frumkvæði að Minningarmóti Birnu flytur ávarp við setningu mótsins.

Í karlaflokki urðu Jón L. og Jóhann Hjartarson efstir og jafnir, en Jón var hærri á stigum. Í þriðja sæti varð Hannes Hlífar Stefánsson, sem mun leiða sveit Íslands á Ólympíumótinu í Bakú sem hefst núna í byrjun september.

Hrund og Veronika fengu verðlaun fyrir bestan árangur 20 ára og yngri, og heimamaðurinn Guðjón D. Gunnarsson (betur þekktur sem Dalli) varð efstur skákmanna með 2000 skákstig eða minna.

Vegleg peningaverðlaun voru veitt á mótinu. Verðlaun í kvennaflokki voru ívið hærri en hjá körlunum, og er það algjör nýbreytni á skákmótum. Það var að frumkvæði Finns Árnasonar forstjóra Þörungaverksmiðjunnar á Reykhólum, sem styrkti mótið með verulegu fjárframlagi. Auk þess tefldi Finnur á mótinu, þó að árangur hans þar hafi kannski ekki verið alveg í takti við peningaframlagið.

Brynjar Pálmi Björnsson og Hrafn Jökulsson. Brynjar hlaut sérstaka viðurkenningu fyrir ómetanlega aðstoð við framkvæmd skákhátíðarinnar á Reykhólum.

Brynjar Pálmi Björnsson og Hrafn Jökulsson. Brynjar hlaut sérstaka viðurkenningu fyrir ómetanlega aðstoð við framkvæmd skákhátíðarinnar á Reykhólum.

Fjölmenni var við setningu mótsins á Reykhólum í dag og ríkti afar góður andi á mótinu. Samhliða fór fram sýning á munum sem tengjast Birnu, bæði listaverk eftir hana og verðlaunagripir hennar af skákmótum, sem og myndir sem tengjast sögu íslenskra skákkvenna.

Við setningu mótsins flutti Hlynur Þór Magnússon sagnfræðingur á Reykhólum ávarp, en hann var frumkvöðull að mótinu og skipuleggjandi ásamt Skákfélaginu Hróknum. Setningarávarpið flutti Ingibjörg Birna Erlingsdóttir sveitastjóri Reykhólahrepps, og svo lék Birna E. Norðdahl, barnabarn skákdrottningarinnar, fyrsta leikinn fyrir Hrund Hauksdóttur gegn Hannesi Hlífari.

Mótið var afar skemmtilegt og spennandi frá upphafi og leikgleðin í fyrirrúmi. Heimamenn á Reykhólum og fjölskylda Birnu tóku virkan þátt í hátíðinni og voru tvær dætur Birnu meðal keppenda, þær Indiana Svala Ólafsdóttir og Anna María Ólafsdóttir.

Frumherjar. Svana Samúelsdóttir og Sigurlaug R. Frðþjófsdóttir tefldu með Birnu Norðdahl í kvennasveit Íslands á ólympíumótum.

Frumherjar. Svana Samúelsdóttir og Sigurlaug R. Frðþjófsdóttir tefldu með Birnu Norðdahl í kvennasveit Íslands á ólympíumótum.

Í mótslok þakkaði Hrafn Jökulsson forseti Hróksins fjölskyldu Birnu, fólkinu á Reykhólum og í Reykhólahreppi, keppendum og bakhjörlum, en þó sérstaklega Hlyni Þór Magnússyni, fyrir frumkvæðið og frábært samstarf við skipulagningu hátíðarinnar.

Í tilefni af hátíðinni færðu Hrókurinn og Þörungaverksmiðjan grunnskólanum á Reykhólum 10 taflsett að gjöf, og munu Hróksmenn efna til skákdaga í skólanum í haust. Mikill skákáhugi er meðal barna og ungmenna á Reykhólum og tóku þau virkan þátt í hátíðinni.

Sæti Stigaröð Nafn Stig Pts BH.
1 3 Jón L. Árnason 2478 7 43
2 2 Jóhann Hjartarson 2545 7 41½
3 1 Hannes Hlífar Stefánsson 2577 44
4 6 Rúnar Sigurpálsson 2280 41
5 5 Guðmundur Gíslason 2327 40
6 8 Sævar Bjarnason 2092 37½
7 4 Ingvar Þór Jóhannesson 2367 5 42½
8 7 Lenka Ptacnikova 2136 5 40
9 10 Hallgerður Helga Þorsteinsdóttir 2014 5 37½
10 21 Guðjón D. Gunnarsson 1620 5 36½
11 15 Páll G. Jónsson 1810 5 32
12 13 Kristján Stefánsson 1831 5 27½
13 18 Stefán Þormar Guðmundsson 1790 35½
14 9 Guðlaug Þorsteinsdóttir 2051 34
15 16 Guðfinnur Kjartansson 1800 33½
16 12 Birgir Berndsen 1892 4 36½
17 19 Hrund Hauksdóttir 1789 4 35½
18 20 Veronika Steinunn Magnúsdóttir 1786 4 33½
19 17 Áslaug Kristinsdottir 1800 4 32
20 11 Magnús Sigurjónsson 1908 4 31½
21 14 Sigurlaug R. Friðþjófsdóttir 1815 4 31
22 24 Einar S. Einarsson 1424 4 29
23 22 Hörður Jónasson 1532 4 28½
24 30 Jón Trausti Markússon 0 4 26½
25 32 Svana Samúelsdóttir 1485 23½
26 23 Hjálmar Sigurvaldason 1485 3 33
27 29 Eiríkur Kristjánsson 0 3 32
28 37 Inga Vala Ólafsdóttir 0 3 29½
29 35 Finnur Árnason 0 3 28
30 28 Jón Atli Játvarðarson 1550 3 27
31 26 Brynjar Pálmi Björnsson 0 23½
32 25 Egill Benediktsson 0 22½
33 36 Indiana Svala Ólafsdóttir 0 2 25
34 34 Gunnar Tryggvason 0 2 23
35 31 Alexander Másson 0 1 24
36 27 Ketill Ingi Guðmundsson 0 1 19
37 33 Björgvin Sigurbjörnsson 0 0 21

Myndasyrpa

Facebook athugasemdir