Fjöldi fólks tefldi í Nuuk Center .

Frábær Flugfélagshátíð Hróksins í Nuuk: Gleðin og vináttan að leiðarljósi

Flugfélagshátíð Hróksins í Nuuk lauk á laugardag með einvígi Steffen Lynge, lögreglumanns, tónlistarmanns og eins fremsta skákmanns Grænlands, og Hrafns Jökulssonar forseta Hróksins. Undanfarna viku hefur höfuðborg Grænlands iðað af skáklífi og liðsmenn Hróksins farið víða að útbreiða fagnaðarerindi skáklistarinnar, gleðinnar og vináttunnar.

Í frétt frá Hróknum sagði Hrafn Jökulsson að það hefði verið einstakur heiður að standa að einvígi Jóhanns Hjartarsonar og Nigels Shorts í Nuuk: ,,Þeir eru goðsagnir í skáksögunni, og mikil forréttindi að hafa staðið að Grænlandsheimsókn þeirra. Báðir eru þeir snillingar, og auk þess með djúpan skilning á einkunnarorðum Hróksins: Við erum ein fjölskylda.“

Einvígi Jóhanns og Shorts lauk með sigri Englendingsins eftir æsispennandi viðureign, en Hrafn segir að úrslitin séu algjört aukaatriði. ,,Megintilgangur með Flugfélagshátíðinni var að útbreiða gleði og vináttu. Við heimsóttum fangelsið hér í Nuuk, athvarf fyrir heimilislausa og efndum til fleiri viðburða sem fyrst og fremst höfðu það markmið að skapa gleði og bjartsýni. Skákfélagið hér í Nuuk fékk að gjöf mikinn fjölda taflsetta frá Flugfélagi Íslands, sem verður dreift í skólana hér í höfuðborginni.“

Þetta var þriðja heimsókn Hróksins til Grænlands á þessu ári og framundan eru a.m.k. fjórar heimsóknir til viðbótar. Alls hafa liðsmenn Hróksins farið oftar en fimmtíu sinnum til Grænlands, síðan skáklandnámið hófst árið 2003.

Hrafn segir að þakklæti sé efst í huga Hróksmanna eftir vel heppnaða Flugfélagshátíð: ,,Fjöldi einstaklinga og fyrirtækja hjálpuðu okkur við að gera þetta allt saman mögulegt. Það sem gerði þessa hátíð núna svo ánægjulega að meðal þátttakenda voru fremstu skákmenn heims, ráðamenn hér á Grænlandi, börnin í Nuuk, fangar, heimilislaust fólk og ótal vinir aðrir. Gleðin og vináttan eru okkar leiðarljós, og við þökkum öllum þeim sem gerðu dásamlega hátíð að veruleika.“

Facebook athugasemdir