Gleðin var allsráðandi á hátíð Hróksins í Kullorsuaq, jafnt hjá ungum sem öldnum.

Allir í skýjunum í Kullorsuaq

Öll grunnskólabörn í Kullorsuaq flykktust á skákæfingar og fjöltefli.

Hátíð Hróksins í Kullorsuaq, 1060 kílómetrum norðan við heimskautsbaug, lauk með fjölmennri fjölskylduhátíð í íþróttahúsi bæjarins, með glæsilegri sirkussýningu. Við sama tækifæri var stofnað skákfélag og skákskóli, og viðurkenningar veittar í myndasamkeppni þar sem viðfangsefnið var sjálf hamingjan.

,,Þetta hefur verið ævintýraleg ferð,“ segir Máni Hrafnsson leiðangursstjóri. Hann segir að nánast öll börn bæjarins hafi tekið þátt í skákæfingum og fjölteflum, og áhuginn var ekki síðri á sirkusskólanum og listsmiðjunni. Aðrir leiðangursmenn voru sirkuslistamennirnir Axel Diego og Roberto Magro, og Joey Chan sem m.a. hafði umsjón með listsmiðjunni. ,,Við komum til Kullorsuaq á afmælisdegi Hróksins, og var fagnað með afmælisköku og söng. Næstu daga flykktust jafnt börn sem fullorðnir í skák og sirkus og myndlistina. Allt gekk fullkomlega upp, og gleðin var allsráðandi.“

Sirkuslistamennirnir Roberto og Axel fönguðu svo sannarlega athygli heimamanna.

Birgitta Kamman Danielsen, æskulýðsfulltrúi Kullorsuaq, sem hafði veg og vanda af skipulagningu hátíðarinnar, ásamt Margréti Jónasdóttur af hálfu Hróksins, sagðist vera í skýjunum með hvernig til tókst: ,,Ég átti mér þann draum að Hrókurinn kæmi í heimsókn með skák og sirkuslistir, til að gleðja börnin hér á alveg sérstakan hátt í tilefni af 90 ára afmæli Kullorsuaq. En þetta varð miklu meira. Börnin, og margir fullorðnir, öðluðust reynslu og innblástur sem verður til þess að þau munu halda áfram þegar okkar góðu gestir eru horfnir á braut. Nú er búið að stofna hér skákfélag og skipuleggja skákkennslu og vikulegar sirkuslistaæfingar.“

Birgitta sagði að hátíðin hefði farið langt fram úr hennar björtustu vonum: ,,Börnin lærðu svo ótal margt og skemmtu sér konunglega á meðan. Þau lærðu að meta gildi samvinnu og þolinmæði, og að eiga sér drauma og þrár. Það var ótrúlegt að sjá hve jafnvel yngstu börnin voru áhugasöm um að læra að tefla. Fjölmörg þeirra báðu um að fá að halda áfram að tefla, þegar gerð voru hlé. Sama var upp á teningnum í sirkusskólanum.“

Hamingjan túlkuð í listsmiðju Hróksins.

En það voru ekki bara börnin sem skemmtu sér, segir Birgitta: ,,Tvö kvöld buðum við fjölskyldufólki að spreyta sig í sirkuslistum í íþróttahúsinu, og þangað kom fólk á öllum aldri. ,,Hláturinn ómaði um salinn og gleðin skein úr andlitum fólksins, og allir skemmtu sér konunglega.“

Frjór jarðvegur reyndist líka hjá fullorðna fólkinu þegar kom að skákinni, og tefldi Máni fjöltefli við níu fullorðna bæjarbúa, sem veittu honum harða mótspyrnu. Tefld var tvöföld umferð, alls 18 skákir, Máni vann 16, gerði eitt jafntefli og tapaði einni skák. ,,Þetta er góður hópur, sem mun leiða skákstarfið áfram,“ segir Máni.

Á lokahátíðinni var stofnað skákfélag undir forystu Ole Danielsen og skákskóli sem Sören Nielsen stýrir, með aðstoð Abel-Enok Hansen. Við það tækifæri færði Hrókurinn nýja skákfélaginu og skólanum 20 taflsett að gjöf, og þeir Ole og Sören fengu einkennistreyjur Hróksins. Þá munu bæjarbúar geta æft sirkuslistir áfram, því Hróksliðar komu með heilmikið af sirkusbúnaði, sem bakhjarlar hátíðarinnar fjármögnuðu. Helstu bakhjarlar voru sveitarfélagið Avannaat, NAPA-sjóðurinn og Air Iceland Connect. Þá komu Hróksliðar að vanda klyfjaðir mörgum góðum gjöfum, ekki síst frá prjónahópnum í Gerðubergi og öðrum velunnurum.

Facebook athugasemdir